طريقي الى جزيرة كبر

اللهم صل على محمد وال محمد

النزول من : رأس السالميه.
الوجهة : جزيرة كبر.
الزمن ذهاب : ساعه .
زمن عوده : ساعه الا عشر دقايق.
في كل عطله بالصيف يكون لنا نصيب في رحلة الى جزيرة كبر الكويتيه وطبعا هذي مو اول رحله اطلع فيها حق هذي الجزيره الممتعه اهيه من احلى الجزر الكويتيه لكن مو احلى من جزيرة قاروه , امس كان في طلعة حق جزيرة كبر بالصبح و الجو كان ممتاز و الشمس مو حاره وايد
و هني كنا بصدد تعبئة الطراد بالبانزين عشان يكون جاهز للمسافه الطويله الي بنقطعها و انتظار اكتمال العدد و هني بقية القوافل التابعه لنا ينتظرون نزول الطراد الى البحر ونقل بعض المعدات و كنا 3 قوارب سريعهو نواصل المسير حسب احداثيات الديره "البوصله" و الـGBSو بعد فتره زمينه تقريبا اكثر من نص ساعه بدت تبين الجزيره بالنظر
و الحين نبدي نرسي على مكان لأنه لما وصلنا حق الجزيره في وقت مبجر ماحصلنا مكان نرسي عليه الاماكن كلها متروسه والجزيره زحمه , ولما رسينا عشان نسبح و نرتاااح و للتان كان جزء كبير بالرحله و حتى للسنوركل كان مستوى الرؤيه التحتيه للمايه زينه و بعدها لما المايه بدت تترس و خلصة الغدا زهبت عند الغوص من السلندره و الفنزات بس لما شفت الوضع مو اوكي حق الغوص قلت بهون وهالسبب واضح عادة الناس لما تسافر تروح جزيرة تسترخي بالجو الهادي و الشمس الرائعه و تتجنب اماكن الازعاج و تعكير المزاج و في عندنا بالكويت كسرنا كل هالحواجز و القوانين قمت اشوف الجتات تمشي فوق الناس الي يسبحون و يمشون بسرعه جنونيه مايراعون يمكن احد يسبح او رعاية للاسماك والمرجان ونقاوة الماي و الطراريد صارت تحت ايدي اطفال تعبث بهذه الاليه و الاغااني بصوت عالي احس اني قاعد بديسكو استغفر الله مابي احب اوضح اكثر شنو شفت عشان لاتصير الصجه و اخدش الحياء العاام
بس الي ابي اعرفه ليش البنات والشباب الي عندهم جتات كله مطيورين و يفترون شوراهم ؟ كا انتوا قاعدين بالجزيره سياحه و استجمام وماعندكم شغل و لا مشغله لما بتروحون الدوام تقدرون تمشون بالسرعه الي تبونها محد قاضبكم بس حرام عليكم جزيرة ناس تسبح يمكن تدعمونها و الله عطاكم سمج و ثروه سمكيه و مرجان حافظوا عليه لازم احد يحد عليكم بقانون ويطقكم على ايدكم
و بالنسبه اذا الواحد حتار وين يروح انصحه بالصيف انصحه بجزيرة كبر او قاروه لأنه صج حلو حق التغير لكن اهم شي انكم تشوفون حالة الطقس و جودة الناقل البحري .