تناتيش هو القلم الحر

بحمدالله تم الانتهاء من تركيب مدونتنا الجديده "تناتيش "

هي مدونه شبابيه يطرح فيها ابرز هموم و مشاكل الشباب و يتناول قضايا متنوعه و مواضيع عامه

ويشترك بالمدونه 3 اعضاء مدونين من الطاقات الشبابيه

المباركيه , بانوراما , بلاك تايقر

TaNaTiSh

موفقين لكل خير

خنفروش الى احمد الحيدر

طلب مني الكاتب احمد الحيدر رأيي بكتابه الجديد خنفروش
فـ اسمح لي ان ابدي بـ نبذه مختصره عن الكتاب
قبل عدت ايام انتهيت من قراءة كتاب صديقي العزيز" احمد الحيدر" بعنوان "خنفروش"
كان كتاب جميل جدا و استقطب مواضيع فريده من نوعها وهو موضوع قضية" المدونين"
وتناول موضوع كيفية انجذابه الى بوابة التدوين
لدية عدة مواضوعات مهمه منها "اللغه العربيه " والكثير منها

و طرح اغلب المشاكل التي تصادفه بالجامعه وخارج المنزل وغيره و بعض من مواضيع عادات الشعب الكويتي
حقا لقد استمتعت بقراءة هذا الكتاب لايمل من قرائته لأنه يحتوي على عدة مواضيع متنوعه
الابداع ليس غريب عليك انما انت مبدع دوما
وكتاب ممتاز

اتمنى لك التوفيق

سؤال بمعرض الكتاب

ذاهب بعد قليل الى ارض المعارض لزيارة معرض الكتاب
ماذا تنصحوني ان اقتني من كتب
كتاب المؤلف احمد الحيدر بغض النظر سأشتريه من اول الكتب

دعوة للمدونين

السلام عليكم ورحمة الله وبركاته

وصلتني دعوه قبل قليل من الاخت "تخاريف طموحه"

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

دعــــــــــــوة


تحت رعاية الأستاذ الدكتور بدر الصقعبي _ عميد كلية العلوم في جامعة الكويت ، يقيم قسم علوم الأرض والبيئة بكلية العلوم _ جامعة الكويت بالتعاون مع الهيئة العامة للبيئة _ بلدية الكويت _ معهد الكويت للأبحاث العلمية _ المنظمة الإقليمية لحماية البيئة البحرية ( الحملة التوعوية للتغيير المناخي ) _ ادارة التقنية البيئية في كلية البنات _ المكتب الثقافي البريطاني ، ورشة عمل حول أثر التغير المناخي على البيئة وذلك يوم الأربعاء الموافق 28-10-2009 من الساعة 10:00 حتى 12:00 وستعرض ورشة العمل مشاركات طلابية تشمل على 50 بوستر تناقش كافة المواضيع المتعلقة بالتغير المناخي والبدائل والحلول التي تنادي بها دول العالم وموقف الدول تجاه الاتفاقيات الخاصة بالتغير المناخي ، كما سيكون هناك محاضرة خاصة لطلبة المدارس مابين الساعة 11:00_12:00 وأخرى مشاركة عامة تشارك بها الجهات المعنية مابين الساعة 12:30 _1:30 في مبنى أ.د فايزة الخرافي .

البرنامج : الساعة 10:00 الافتتاح واستعراض البوسترات

الساعة 11:00 محاضرة خاصة لطلبة المدارس ومناقشة عامة

الساعة 12:30 محاضرة عامة _ حفل شاي _ التوقيع على مذكرة منهجية العمل للتوعية بمخاطر التغير المناخي

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ



أختكم

تخاريف طموحه

طلعة شاليه


طبعا مثل ماقلت لكم بالبوست السابق انه سبوع الي طاف كان في رحله لي منتزه سي شيل
والجو كان حده ابداااع بمعنى الكلمه
نقوم الصبح نروح نسبح بالبحر المايه حلوه و ينسبح فيها
و بليل الجو عجيب ونقدر نقعد بره وسوالف و قز على كيفكم لوول
المنتزه هااادي غير الخيران الي الواحد مايقدر يفتر بليل مع اهله ويتمشى والسبه المصبنه

وخاصه الميزه الي محليه القعده بالشاليه انا كنا مأجرين احنا من الاهل 15 شاليه لا اقل ولا اكثر ;p
لي صار وقت الريووق تشوفون الكل شوي شوي ينزلون ويتمعون بمطعم الفندق "سي شيل"
و الونااسه و السوالف الطيبه الي ماتنمل و كذالك كان مع عشى و الغدا احنا ندبر عمرنا في بره برجر كنج و بيتزا هت وغيره
بس احنا كنا مانخلي لازم الطبااخ و الاكل السنع
بس الشغله الي مو عاجبتني الاسعاار عندهم ناار شدعوه جذي قلنا انه مكان بعيد عن الديره
خو اروح استراحة رحال ولا غيرها اشتري ماجله و ارجع الشاليه اشرف لي ولا ريد بول او عصير سلاش بدينار !!
الحين انا اكتشفت سر الوناسه شلون تصير ؟
اتصير بيمعة الاهل
كانت زيااره اكثر من ممتعه

ملاحظه : هذه النظاره و جهاز الام بي ثري لايفارقاني لأنهما صديقاي بالرحلات الممتعه

عالمي الحزين

مدونه رائعه اتحفتنا بمواضيعها الجميله
استمتع حقنا حينما اقراْ احدى تدويناتها الجديده
ادعكم مع الرابط لزيارة المدونه
عالمي الحزين


سفره بالداخل


سوف انطلق بعد قليل الى منتزه "سيشيل" في اجازه استرخاء لمدة ليلتان بعيد عن الضوضاء
و عطله سعيده
الى اللقاء
نراكم لاحقا

هل صوت المدون مسموع

الكثير من الاخوه و الاخوات المدونين يدونون بعض حاجات و متطلبات الشعب لننهض بتطوير الدوله رغم ارائهم و اقتراحاتهم و شكاويهم غايتهم الارتقاء لكن صوتهم غير مسموع
يأتي هذا على عاتق ثقافتهم و شهاداتهم العاليه عكس احد الاشخاص ليس لديه شهاده كبيره و ثقافته متدنيه بالحظيظ لكن له مكانه عاليه و صوته مسموع اكثر من قبل الجهات الصحفيه و السياسيه و غيرره ...

اين دور المدون حاليا ؟
فهو له ملكة الفهم و السعي الذاتي في تطوير الدوله و يمنون للارتقاء اكثر من غيرهم
و عندما يدون ليس له مصالح شخصيه من شهرته و الاستفاده من الراتب الشهري و السياره المجانيه الفخمه
المدون له عطاء وافر لشعبه من صادق شعوره و يستطيع الاخذ و العطاء بسلاسه مع احد الجهات الكبيره المعنيه بالدوله

و اترك لكم التعليق ...

Cloudy With A Chance



كانت زياره ممتعه لي مع هذا الفلم الرائع يحاكي قصة طفل كان متحبط دائما بأعماله و طموحاته وانصحكم بزيارته

اول يوم دوام

بهالبوست راح اسرد كل الي صار معاي اليوم بالدوام
يعني 40% تقدرون تقولون البوست بايخ

رجعت من الدواام حسيت انه كئيب
اول شغله امشي بوقت الفراغ ماعندي احد اعرفه لاربع ولاخليل
لأنه اغلبهم الي بالمعهد كلهم نفس القبيله و من ربعنا ينعدون بالاصابع
طريقة الدوام ماعجبتني وايد خاصه طريقة الحصص
مثل نظام المدارس !!
الصراحه المسمياات اتعب عليها لول
كل طالب شطوله و شنب ولحيه
يقول يلا فرصة - يلا حصه
مايقول ساعه دراسيه ولا يقول وقت فراغ
ودي احس في رقي بالمعهد احس اني انا كبير
ماني قايلكم الدكتور بقول مدرس
لما خلصنا الدوام وبنطلع يقول طلعوا اثنين اثنين
بغت تطلع من حلجي كلمه فيها عصبيه "انته شفيييك ياهل " ;p
ناهيكم عن اللبس البلسوت ودي اسألهم انتوا الحين بأي عصر الي لي الحين تلبسون جذي
الناس وصلت كمبيوترات و مكاين وانتوا لي الحينكم درنفيسات و وايرات خلكم على مينونكم
والي ضحكني اكثر
مدرس يدرس 3 مواد بيوم واحد و وره بعض (رياضيات-رسم هندسي-تقنيه نظريه)
هالمدرس عجيب بددع اليوم بطلباته لو الحين بسرد طلباته بورقه !! الورقه تنترس واهوه ماخلص طلباته
شغلات تضحك الي طلبها
هالحاله عاديه عندكم
ولا مستعصيه ؟
ولايعطيكم طريقة شرحه يااابوي حركات اكشناات
يقعد يعلمنا الضرب شلون تنكتب والقسمه شلون تنكتب
كان ودي اقوله ممكن تفكني من مادتك لأنه انا دارس مادتك واصعب منها الكيميا و الفيزيا والاحياء
هالمره ياي تعلمني تعريف المساحه الطول × العرض شهالسخافات
ومسألة الغيااب ولحضور مادري ليش مشددين عليها قبل كل شي
عاد مو لي هالدرجه تحاسبونا على الثانيه
يكفي انكم مو معطينا جداول متى تبدي المواد ومتى تخلص "فوق شينكم قوات عينكم "
واذا احد تأخر لايعطيكم اسلوب تعامله اسلوب بايخ حده
انا مستانس انه الاربعا و الخميس يوم كااامل كله ورشه قاعد اقص على نفسي يمكن اقدر شوي اتأخر محد يحاسبني و اقدر اطلع مبجر
ان شاء الله يصير واقع
لوول ناس دواماتهم بالرااحه ونااس غصب طيب يشلعون روحهم من لفراش ;p


في المعهد

عدت قبل قليل من المعهد التطبيقي بصباح السالم
و يبدو ان الكأبه مسيطره عليه سيطره تامه

حين ماعدت من السفر في اليوم التالي ذهب الى المعهد لاستكمال اجرائات التسجيل من صباح الاحد ولم انتهي منها الى هذا اليوم
كانت اجرائات كثيره ليس لها داعي من الفحص الطبي و التبصيم
لكن ما زادني كئابه حين قال لي احد الموظفين هناك لا ادري ما محله من الاعراب هل هوه مدير ام مسؤل لايهم
قال لي "تعال يوم الاحد الساعه سبع ونص و اللبس البلسوت"
حسست انه سوف يغمى عليي من اللبس الذي فرضه عليي لأنه عندما ارتديه اشعر انني "بنجرجي او عامل مكيف"
لا اريد التزامات هكذا مثل دوام المدرسه من لبس محدد و توقيت مبكرا
لكن الله كريم

موفقين جميعا

مقتطفات سوريا


بناء على طلب احد الاخوات سأقوم بتدوين هذا البوست اهداء لها


* بالحقيقه سفره كانت جدا ممتعه رغم القصور الذي ورد من الحمله المتفق عليها

* اجمل ما بالرحله جمعة الاهل التي حصلت و تعرفنا على الكثير من الزوار الذي معنا

* كان جو رائع جدا اروع من ماتوقعت و الجلوس بالمطاعم بالهواء الطلق لاتتفوت

*كان هناك تخطيط لزيارة لبنان لمدة ليلتان لكن حدثت امور و مشاكل دمرت هذه الرحله

* لا ادري لماذا هذا التقصير من الحمله رغم اسمها العريق كنا نسمع عنه منذ اكثر من 9 سنوات

* اصبحت جزء مهم للرحله بالاخص عندما واجهنا المشكله عند الحدود اللبنانيه والسوريه
عندما ذهب كوادر الحمله لحل اجرائات الامنيه الذي دام اكثر من 12 ساعه لاحس ولا خبر لهم
انطلقنا من الفندق بالساعه 5 فجرا و انتهينا بالساعه 12 بلا نتيجه

كيف اصبحت جزء مهم ؟
عند غياب مسؤولين الحمله عن الباص الذي به الزوار
قمت بأعطاء الزوار التعليمات الازمه و مساعدتهم و تزويدهم بالمياه و تدبير مكان للصلاة و غيره

*لم اعلم انه بعض الشعب السوري يعشق النقود بدرجه كبيره و سوء معاملتهم لكويتين

*كان فندق الاقامه سيئ جدا رغم انه تم افتتاح للتو وجبات الافطار والغداء والعشاء اقيمها لكم بـ 40 %
و خدمة التنظيف معدومه نهائيا و اشياء كثيره تقنصه من خزانات لوضع الملابس و اكرمكم الله الحمام تصميمه فاشل

*لديهم الكثير من الاماكن المقدسه الجميله لزياتها

* احبتت الكبه و الحمص عندهم و الاطباق الرئيسيه لاتفرق عن اطباق الكويت

* اضحكني امر ما هناك بأن الاطفال بالكويت يشغلون وقت فراغهم بالتسمر على الكمبيوتر او اللعب بالبلاي ستيشن وغيره اما بسوريا يلعبون بمسدس "الصجم" لايخافون ان تصيبهم مصيبه تدمر اعينهم او تجرحهم

*امر التزاور شيء جميل ان بيوت الاقارب بجانب بعض و الاسواق تحتهم عكسنا بواقع الكويت

* تنظيم المرور و تنظيم الوقت و الترتيب شيئ لايفكرون به نهائيا

*اذيال التعب لحد الان تخيم علي
نراكم على خير

لخبطه2

السلام
****
تقبل الله اعمالكم
وهذا اخر جمعه بالشهر الفضيل
ويكون يوم مميز
***********
عدنا للتحلطم من جديد
.......
لقد عزمت ان اسافر سفره مع بقية الاهل الى لبنان + سوريا لمدة سبوع

+-+-+-+-+-+-+-+-+-+-+-+
قبل جم يوم كنت سهران لي الصبح سمعت صوت الجرس يطق
جان اطلع بره و له اشوف شخص يبي يعدل النخله ينظفها ويقصها
بعد ما استأذنت من الوالد جان يقوله خله يدخل
قعدت على البلكونه الي بالحوش
و قاعد اشوف الـview الي بره مقابل البحر بس من داخل البيت ;p
بيني وبينكم بما انه احنه بالكويت فحسيت انه المنظر شوي حلو
لو كنت فاطر و قاعد اشرب قهوتي ومجابل هالمنظر
ألمهم خندش بالمهم ;p
طبعا الي مغطي على المنظر جدام بيتنه في مثل براحه
ماقصر الي شره البيت الاخ غاثني باط جبدي ودي اييله ازفه ;p
قبل كنا مستفيدين من البراحه مو بس احنا الفريج نصه مستفيد يسفطون سيايرهم و حق لعب عيالهم
الحين يي الاخ الي غاثني سوور البراحه بالزرع الي شرفعه خرب علي الـ view
و حرم الناس منها
طبعا لما رحت فوق السطح قلت بشوف هذي شنو فيها و لما طالعت عورني قلبي صار "عصير عوار قلب (ماعليش قام اخورها عالصبح)"
خل اقولكم شنو فيها
براحه شكبرها اقدر اطلع فيها بيتين اهوه مستحلها مسوي فيها بس جزء صغير حوالي بس 100 متر مظلات سيارات
و الباجي كله خرايب وزرع شطوله
بس الصراحه مايستحي
هذا مو انا اقول مايستحي البلديه تقول انا اقولكم شلون
مع الازاله جم مره ياو و حذروه قص زرعك وقص زرعك
يقصه شوي و يخليه يصكر على الفريج ويصير مغموت جني داش مزرعه مسكونه
و اذا مثلا كنت داش الفريج بالسياره وسياره ثانيه طالعه احتمال كبير 70 % يتداعمون
لما كنا صغار قبل نلعب فيها كره و قواري ;p و المصبنه عيالهم لهم دور كبير
استحوا على ويهكم بيت فيه بنات قاعدين تحت لي تالي الليل تشربون زقاير وضحكهم واصل لي اخر الدنيا
هالجيران مو متهنين وياهم
لكن الرسول (ص)وصانا عليهم
=-==-=-==-=-=-=-=-=-=-=-=
بما اني بسافر بعد يومين فـ عندي شغلات وايد ودي اشتريها وسويها
بس الحمدلله قضيت جزء منها شحنت الكاميره و حطيت قصايد بجهاز الـmp3
و اهم قصيده حاطها "قرأن الغرام"
هالقصيده لازم لازم كل ما اركب طياره اسمعها لها ذكريات حلوه و كلماتها تناسق الطبيعه
و امس رحت المهلب مع ربعي للامانه 2 عيال الخاله شرينا نظارات ray ban كلنا نفس الشكل و الموديل
بما ان احنا اخوان واكثر من اخوان من 15 سنه و اذا مو اكثر
يعني شكلنا بالسفره كلنا نفس اللوك حده لووول
وشريت كتاب "في الجانب المظلم" عشان اتسلى فيه بالطياره و اذا حاشني ارق بالنوم
و بس بقالي الملابس عندي من قبل و بشتري جم قطعه حق المطار و بشتري مستلزمات شخصيه

=-=-=-=-=-=-==-=-=--==-=-
و بغيت اقولكم انه اليوم طلع القبول
بس الصراحه بمكاان يفشل حده
انقبلت بمعهد الصناعي الي بصباح السالم
مادري شلون طريقتهم ولا اذا تخرجت شنو راح اتوظف وجم يكون راتبي
بس يالله شي احسن من لاشي